Antecedentes

A partir dun dicionário para o ispell obtén-se con relativa facilidade unha lista ordenada alfabeticamente das palabras que o dito corrector recoñece como válidas. No caso da versión 0.3 do dicionário galego esta lista consta de 214.328 palabras. Con esta lista pode elaborar-se un dicionário para o corrector ortográfico para Windows Spell Checker for Edit Boxes.

Os critérios lingüísticos que seguimos para elaborar este dicionário recollen-se na seguinte páxina.

Características do corrector

• Spell Checker for Edit Boxes é un corrector ortográfico que se pode empregar sobre multitude de aplicativos en Windows 3.1/95/98 capaces de editar texto.

• Mantén-se normalmente en segundo plano, chamando-se mediante unha combinación de teclas, definida polo usuário.

• Existen dicionários mestres para várias línguas, e ademais poden criar-se dicionários persoais, facilmente editábeis.

• Os requerimentos do sistema son modestos é deberia executar-se en calquer computador. Spell Checker for Edit Boxes requere Microsoft Windows 3.1 ou superior. En Windows 95/98 traballa coas aplicacións de 16-bit e con algunhas, non con todas, das de 32-bit. NON pode instalar-se en Windows NT da versión 4.0 en adiante.

• Spell Checker for Edit Boxes é un corrector ortográfico gratuito para uso privado e educacional; para uso corporativo, comercial ou governamental debe rexistar-se e pagar unha pequena taxa.

Obtención

1. Un cos arquivos do programa.

2. Un dicionário (.SCD) tal e como ha no galician-scd-03.zip, que fornece as palabras dunha determinada língua, neste caso o galego. Debe instalar cando menos un dicionário para que o programa poda funcionar. Este dicionário debe colocar-se no mesmo directório no que estexan os arquivos do programa.

No site do criador do programa pode achar outros 10 dicionários.

Tipos de dicionários

O corrector Spell Checker emprega dous tipos de dicionários:

1. dicionários mestres coa extensión SCD que están comprimidos e que non se poden editar nen actualizar.

2. dicionários persoais coa extensión DIC que @ usuári@ pode criar, editar, engadir ou eliminar.

Non pode empregar un dicionário mestre coa extensión SCD como se fora un dicionário persoal, e se tenta facé-lo vai-no estragar. (Se tal ocorrera debe eliminá-lo e reemprazar con unha cópia do orixinal do arquivo de distribuizón).

1. Extraia o programa e os dicionários usando PKZip, WinZIP, Norton Unzip ou algun programa similar. Os arquivos extraídos deben situar-se nun directório permanente no seu disco ríxido.

(WinZIP pudo ter extraído automaticamente os arquivos, situando-os en distintos directórios, nese caso debe coloca-los todos no mesmo directório.)

2. Crie un atallo para o programa SPELL.EXE arrastando o ícone do spell.exe desde o a pasta que o conteña ao escritório. Este paso non é imprescindíbel.

3. Execute SPELL.EXE, que lle amostrará información sobre a licenza e unha xanela de opcións na que pode adaptar a configuración.

4. SPELL.EXE detectará automaticamente os dicionários mestres e apresentará-lle unha lista con eles nunha caixa nomeada 'Language:' na metade direita da xanela de opcións.

5. Caso de ter instalado un só dicionário mestre, SPELL.EXE escollerá-o automaticamente como o dicionário mestre de traballo. Se ten instalado máis de un, debe seleccionar o que quer usar en primeiro lugar na lista 'Language:'.

6. SPELL.EXE criará automaticamente un dicionário persoal e chamara-o DEFAULT.DIC. Este nome deberia listar-se en primeiro lugar na caixa que aparece na parte superior direita da xanela, xusto en baixo do cabezallo 'Dictionaries maintenance'.

Para modificar o nome ou o status do dicionário persoal ou para criar dicionários persoais adicionais, use os botóns 'Add' (engadir), 'Edit'(editar) e 'Delete'(eliminar) que fican a direita da caixa cos dicionários.

NOTA IMPORTANTE. Por un erro do programa, este cria o dicionário persoal DEFAULT.DIC como un arquivo só leitura.  Debe modificar isto para poder engadir-lle palabras. Para facé-lo clique no botón 'Edit', aparecerá unha xanela e nela debe clicar no cadrado que ha acarón da lexenda Read Only(só leitura), de xeito que esta opción ficará desmarcada. Entón clique no botón 'OK'.

7. Máis información sobre as opcións disponíbeis na axuda.

8. Despois de escoller as opcións que considere pertinentes clique no botón 'Install' para instalar o Spell Checker no seu computador. (Pode aceder máis tarde ao menu de opcións e modificá-las como desexar).

9. Reinicie Windows. Cada vez que se inicia o Windows vai aparecer na parte inferior esquerda da tela e durante uns segundos unha etiqueta do Spell Checker. (Pode evitar que isto suceda desmarcando o ítem 'Show startup box' na parte inferior direita da xanela de opcións, xusto en baixo de Configuration).

Desde algun programa que permita editar texto (wordpad, block de notas, wordperfect...) prema as teclas do atallo que teña seleccionado nas opcións. A combinación de teclas que ven por defeito é [Ctrl]+[Alt]+[F12]. Ao premer a dita  combinación de teclas abrira-se unha xaneliña,

• ben a correspondente ao corrector (Spell Checker),

• ben unha para engadir un novo tipo de programa (Add Type), cando use o corrector por primeira vez con un determinado programa.

Neste caso na maioria das veces chega con clicar no botón 'Add' sen modificar nada na caixa de 'Settings'.

Nalguns programas, por exemplo Wordperfect, para que apareza a xanela do corrector cumpre ter seleccionado o texto que se quer corrixir, e caso de querer corrixir todo o texto haberia que o seleccionar todo.

Pode aceder-se á xanela de opcións desde a xanela principal do corrector (escreba algo con unha ortografia incorrecta deliberadamente e corrixa-o para que apareza a dita xanela), ou executando SPELL.EXE.

Se ten problemas, tente corrixir no Block de Notas. Isto debe funcionar sempre, se Spell Checker esta configurado axeitadamente.

Tamén pode ler o FAQ sobre problemas que ha na axuda.

Execute SPELL.EXE e clique no botón 'Unistall' no parte inferior do recadro 'Configuration'. Pedira-se-lle que reinicie o Windows.

Unha vez reiniciado o Windows pode eliminar tranquilamente os arquivos do corrector do seu disco ríxido.

É un proceso sinxelo, mais para o que cumpre ter unha lista de palabras, con unha palabra por liña e ordenadas alfabeticamente.

1. Executa-se o programa BUILDSCD.EXE

2. Onde aparece "Word list" selecciona-se o ficheiro coa lista de palabras, por exemplo: galician.dic

3. Selecciona-se a opción "Create new dicionary"

4. Onde aparece "Create as" escrebe-se o nome que se lle quer dar ao novo dicionário, por ex.: galician.scd

5. En "title" escrebe-se un nome axeitado, por exemplo: galician

6. Preme-se "Start"

7. Sai unha mensaxe de "available memory ..." ; premer "Si".

8. O BUILDSCD.EXE vai criar o dicionário no directório onde estexa a lista de palabras. En todo caso o dicionário criado debe colocar-se no directório onde estexa o programa SPELL.EXE.

[1] Os nomes dos arquivos

Nestas instrucións escreben-se completos os nomes dos arquivos, incluindo as extensións. Se esta a usar Windows 95 ou 98, as extensións poden non aparecer no Exporador de Windows, xa que este por defeito oculta as extensións dos arquivos. Se o desexar pode modificar este comportamento:

1. Execute o Explorador de Windows;
2. Seleccione a opción 'Ver | Opciones...';
3. Clique en 'Mostrar todos los archivos';
4. Clique 'Aceptar'.

Mesmo coas extensións ocultas pode identificar o tipo de arquivo:

1. Clique co botón direito do rato na xanela direita do Explorador de Windows;
2. Escolla 'Ver' do menu;
3. No submenu que aparece clique en 'Detalles' co botón esquerdo do rato. Isto da lugar a que se mostre mais información sobre os arquivos, incluindo o tamaño, tipo e data de criazón ou última modificación.

Os dicionários mestres teñen a extensión SCD. Esta extensión é identificada polo Windows como pertencente a un arquivo "Microsoft Schedule Plus". Esta é unha confusión acidental que non afecta en modo algun a operación do corrector Spell Checker.